我嘅職業係：精神病院護士（上）
我必須承認，我只係一個平凡嘅女人。
中學畢業後，我轉咗幾份工，都覺得人工唔高，又冇乜前景。
呢個時候，親戚英姐介紹咗一份工畀我，佢喺一間精神病院度做護士，呢排精神病院請人。
我冇學過做護士，但親戚話，呢間精神病院根本唔需要真正嘅護士，只要勤力聽話，好好照顧病人就得。
我都明白，喺我哋呢個小城市，好多嘢都冇大城市咁講規矩。
見工嗰陣，對方都係問咗幾句，知道我係英姐介紹，就決定請我。
人工比我之前嘅工高幾倍，所以我都好滿意。
我覺得，我雖然冇咩專業知識，但呢份工始終係照顧人，我都算做緊一件好事。
工作內容好簡單，除咗照顧病人嘅起居飲食，就係配合醫生嘅指示，幫病人打針食藥。
打得最多嘅針，就係鎮靜劑。
精神病院嘅病人真係好癲，成日都大吵大鬧，話自己根本冇病，話要出去。
有啲病人仲會嘗試逃跑、故意搗亂，完全唔配合治療。
遇到呢啲情況，我哋會用索帶將病人綁喺床上，再嚴重啲嘅就要打鎮靜劑。
我聽講，打得太多鎮靜劑，對身體唔好。
所以未到好極端嘅情況，我儘量都唔會為病人打鎮靜劑。
但其他護士就唔係咁諗啦，佢哋為免麻煩，係唔係都打鎮靜劑。
我人微言輕，都冇咩辦法，唯有喺我可行嘅範圍內，對啲病人好啲啦。
直到有一次，有個叫阿嬋嘅中年女人，俾屋企人綁住，送入精神病院。
佢成身都係瘀青，重俾人用布塞住把口。
阿嬋嘅老公吳先生話，阿嬋患有精神病，成日會打人同掟嘢，仲有自殺傾向。
為咗制止阿嬋，佢哋不得不用暴力嘅手段。
吳生一次過交咗一年嘅醫藥費，交待我哋好好照顧阿嬋。
我一拎開阿嬋口中塞住嘅布，阿嬋就大叫：「我根本冇精神病，放我出去！」
個個病人都會講呢啲說話，我冇太在意。
阿嬋繼續大叫：「係我老公，佢想拋棄我，所以同所有人講我有精神病，我真係冇病㗎！」
唉，好多精神病人都有被迫害妄想症，呢種故事我聽得太多。
幾日後，我拎飯畀阿嬋嗰陣，阿嬋突然望住我：「妹妹仔，我知道你唔信我，但我真係冇病……」
阿嬋講咗一個好長嘅故事，佢話吳生本來係一個地盤包工頭，兩個人相濡以沫，一齊建立家庭。
後來吳生賺咗錢，又趁低吸納買咗幾層樓，慢慢就成為城中有名嘅富豪。
但男人有錢就變壞，吳生有咗錢之後，唔止包二奶，仲對阿嬋各種嫌棄，平時都好少返屋企。
阿嬋提出離婚，想分番屬於自己嘅財產。
吳生點會俾佢分錢，乾脆搵咗幾個大漢，綁起阿嬋，夾硬將佢送嚟精神病院。
阿嬋講嘢邏輯清晰，情緒都好冷靜，完全唔似一個精神病人。
呢個時候，醫生行入嚟同阿嬋講：「經過診斷後，我哋確定你有嚴重嘅思覺失調同狂躁症，要長期留院。我哋都會將呢個消息，通知你嘅屋企人。」
阿嬋即刻講：「醫生我真係冇精神病㗎，係我老公……」
阿嬋話音未落，醫生已經擺擺手同我講：「病人好唔冷靜，同佢打一支鎮靜劑。」
我幫手講：「醫生，阿嬋可能真係……」
我話未講完，醫生已經睥住我：「叫你打鎮靜劑啊，你聾㗎？」
喺醫生嚴肅嘅眼神下，我逼不得已，只好拎起鎮靜劑，幫阿嬋打咗一針。
阿嬋嘅目光悲哀而不甘，但佢抗拒唔到藥物嘅效力，佢漸漸瞓番落床。
下集：http://bit.ly/2N1bupE
Patreon訂閱即時睇下集，快人一步：https://www.patreon.com/tomato28
#短故 #短篇 #小說 #陳美濤 #廣東話 #粵語 #tomatochan #我嘅職業係精神病院護士 #我嘅職業係
Search